Betlehem-ster
As die drie wyse manne vandag
uit die Ooste sou aankom,
sal hulle maskers dra;
nes Maria en Josef
in die stal aangetref
met die Jesus-kind.
Nie goud, wierook
of mirre sal hulle bring
hierdie keer nie.
Saam met geloof, hoop
en liefde waarskynlik
‘n antidoot
téén die kroon van siektes
wat alle sekerhede
nou óntmasker.
© Joan Hambidge, 2020
Luister by die onderstaande skakel hoe Joan Hambidge die gedig “Betlehem-ster” voorlees: