Dors
Die kosmiese verhaal van water.
Die Skepper proklameer
die wette vir sy materie:
gravitasie en kernkrag
elektromagnetiese veld
energie massa straling
plof uit met ’n magtige knal
neutrone protone elektrone
in ’n plasma saam gemaal
gravitasie knel partikels
fuserend inmekaar
bou algaande swaar atome
suurstof vang twee protone
die eerste watermolekuul
les algaande die kosmos
se lewensdors
asteroїde en komete
bring gevriesde water
uit die solêre nebula
die wye ruimte deur
oorstroom ook planeet Aarde
dit kry spinnend ’n klimaat
panspermies sweef
die lewensade
om waterryke planete
met lewe te bevrug
gedryf deur evolusie
die sterkstes regeer
plant en dier en mens
floreer met water
dorstig ingeteug
kom die historiese moment
inkarneer die Skepper sig
in Homo sapiens
bring die Woord en Lig
verklaar die grootse doel
van gans die eksperiment
die Skepper ervaar
elkeen se lewensloop
in die materiële gang
bevolk daarmee
die ewige ultrabestaan
waar liefde moet gedy
Hy word self slagoffer
van evolusie se geweld
as hy swig voor mensemag
aan ’n kruis genael
kom sy eensaam roep:
‘Ek het dors!’
© Hennie Smith, 2022