Trienke Laurie. Mevrou Klara Jacobs
Mevrou Klara Jacobs
Ons het nog bly bid
terwyl ons – voete in die water –
op die dakrand sit.
Windpompe breek soos vuurhoutjies op.
Die lug was pikswart oor die Moordenaarskaroo
tog na die noorde trek dit tydelik oop
wys ʼn reënboog en gee ons hoop.
Soos Elia met die kraaie en die brood:
stroom by ons verby:
suur appels en ʼn blik Nespray.
My seun Maarten en sy vriende
gebruik ‘n leer wat dien as hangbrug
en help ons na Gods aarde terug.
* * * * * * * *
Iewers vang ʼn kamera-oog
ʼn Bybel oopgespoel
by Noag, die ark en die reënboog?
© Trienke Laurie, 2022
