Oukersdag by die see
vroegoggend het die son al begin bak
tot die strand sagte strooigeel sponskoek is
oor die middag kook die duine: ‘n dik warm vla
maar skemer koel die lug af tot oranje en rooi
jellie wat stol in die seewater-kristalglasbak
toe klits suidoos die wit wolke styf soos room
en donker sprinkel blink sterre-strooisel daaroor
middernag bring een groot ster van betlehem af
en sit dit bo-op hierdie koninklike krismis koekstruif
© Elmarie Stofberg, 2022