Riemtelegram
vir Nico
Moet uiteindelik bieg:
ek was toe die Maandagaand in Muelmed
’n week vóór die Suster eers
sou bel op die Saterdagmôre
na soveel wik en weeg
móés ek gaan groet
het ’n paar tree teruggedeins
vir jou roggelende skelet
die warrelende stank
en jou brommervingers.
Wil ook vir jou sê:
hoe woedend ek was op jou begrafnis
jou Gereformeerde familie se
Spartaanse stiltes en mistroostige clichés
“Hy het verskrilik gely hier teen die einde”
sanik tant San
“Hy was mos skeef, jy sien, sy verdiende loon”
spuug oom Jan.
Moet jou ook vertel:
die Kreef raak nou gewoond daaraan
om af te maai onder ons: Roelf, Heinrich,
Gert, Johan en ’n dosyn ander
brein, pankreas, kolon, prostaat
die ganse Gray’s Anatomy word
uiteindelik vrot daarvan.
En dan net ’n laaste ding:
John, jou verpleër wat swygend lees
Uluka 20:36
alleen op ’n agterbank
in dié skynheiligdom:
“Abasakwazi ukufa; ngoba banjengezingelosi”.
© Neil Cochrane, 2023