Chemoterapie
Ons het alles uitgesny.
(Is jy bly?)
Maar jy moet weet…
(Is jy gereed?)
eers sal jy
alleen
ʼn lang, lang pad moet stap.
Hierdie pad moet jou lei
na lewe sonder ly.
Terwyl
jy
een dag op ʼn slag
tree vir tree vir tree
tekens van herstel verwag
kan niks en niemand
(met of sonder woorde
of ʼn uitgestrekte hand)
die spore
van hoop en wanhoop
en wanhoop en hoop
uit jou pad en jou gemoed uitvee.
Hierdie pad
kan jy net met jou eie voete loop.
© Andrea Sieberhagen, 2023