Stuiwer
daar’s ‘n muur rondom
die stad
met ‘n poort
bewaak deur soldate
waardeur reisigers
kan loop
terwyl ek opkyk na klipsteenmure
romerig en bruin gedruk
teen die koningsblou lug
hoor ek die gedruis
van mense wat kom en gaan
sien ek donker gange
van eeue se bestaan
stellasies
waar hulle artefakte uithaal
met my wandeling vanoggend
deur die goudwit stad
het ek in een gebod
‘n nuwe poort ontdek
sonder geweer of slot
aan die rivier
kronkelend verby wingerd; dadelboom en vy
loop ek deur
en voel
hoe die ou lap
soos ‘n mantel
van my rug afskeur
© Margaret Cordier, 2023