Die bekende skrywer en historikus Dan Sleigh is vanoggend, 29 Julie 2023, in die ouderdom van 85 jaar oorlede.
Sleigh was veral bekend as historikus en as skrywer van historiese romans. Hy het een digbundel gepubliseer, naamlik Duif oor water (1971). Hy sal onthou word vir romans soos Eilande, Afstande, 1795 en Wals met Matilda, maar ook vir verskeie boeke met ‘n historiese strekking. Hy was een van die wêreld se voorste kenners van die VOC-geskiedenis en die tydperk van die Nederlands Oos-Indiese Kompanjie.
Sleigh het tydens sy lewe verskeie eerbewyse ontvang, onder andere die Ridderskap van die Orde van Oranje-Nassau.
Sy heengaan laat ‘n onvervangbare leemte in die Afrikaanse letterkunde. Soos verskeie kenners vanoggend beweer het: Daar het met Dan Sleigh se afsterwe verskeie biblioteke afgebrand.