Anton Döckel
Kersfees kom
Ek wonder hoe die eerste Kersfees was
stil en nederig vir ‘n nuwe begin:
die baba uit die glas voortgebring
neergelê om aardse lig te sien
die bors van ’n moeder te voel.
Was daar ’n eerste skree
was daar ’n waar is ek?
Eerste kom die herders
wat engele hoor sing het
word vertel
geskenke was op pad:
goud, wierook en mirre
onder ’n ster.
Vergiffenis was ons present
toegedraai in die Evangelies –
al die pad van Bethlehem af
*
Driekie Grobler
Die ware rede vir Kersfees
ʼn verlate stilte hang oor die besige stad
daaglikse geroesemoes vir ʼn stonde gesluier
agter tyd vir besin, feesvier en samesyn
want dis Kersfees
families kokon in hul afgesonderde veiligheid
haweloses dwaal verlate in strate rond
kerkklokke beier die blye boodskap uit
want dis Kersfees
skoongeskrop in gelapte hand-me-downs
staan plakkerskampkinders blinkoog afwagtend
vir ‘n genadegif uit die hand van barmhartiges
want dis Kersfees
honger monde krul op in wye lag
oë blink oor uitkoms teen daaglikse stryd
verbloem ‘n stonde die bitter van elke dag
want dis Kersfees
met geloei arriveer die genadestoet
word luid verkondig die vredesboodskap
van ʼn verlosser wat hoop sal bring
want dis Kersfees
voete ritme saam op drummer boy se pa-ram-pa-pa-pam
ʼn salige oomblik se ontsnap teen verniel en vertrap
‘n stonde se vergeet van al die swaarkry en leed
want dis Kersfees
met die wegsterfklank van “ʼn Heiland is gebore”
kyk ʼn kindjie dankbaar verwonderd na bo
in sy hand ʼn kosbare pakkie
in sy hart die boodskap van hoop geplant
hy’t iets beleef wat hoop vir die toekoms bring
die ware rede vir Kersfees
©Driekie Grobler (2023)
*
Hennie Maartens
nuwe jaar
nuwe jaar is soos ‘n tarentaal
dit is onvoorspelbaar waar
dit skryf ‘n nuwe verhaal
in ‘n onbekende taal
© Hennie Maartens, 2023