die etimologie van pyn
in Engels lê pyn se oorsprong
in penalty en punishment
en kan mens daaroor dig
met ʼn soort poëtiese noodwendigheid
maar in hierdie taal staan pyn alleen
in hierdie taal is pyn ʼn lemma
onthef van fonetiese verwantskap
met boetedoening of straf,
tog tweesnydend deur murg en been
lê dit die lieflike geraamte bloot
wat wrik en kneukel en skarnier
deur Nederlands, Oud-Frans, Grieks, Latyn –
die wéét, in tong en in gebeente,
van pyn.
© Ilse van Staden, 2024