Onsigbaar (M)
Ses-en-veertig jaar later
en ek sit in ’n recliner
met oorfone op
in my hipnoterapeut
se spreekkamer.
Ons klim tydsaam nege-en-dertig trappe
af tot by die swembad. Ek is sewe.
Ek bewe. My dryfbandjies lê eenkant
op die rand. My maatjie se opblaas
ringdoughnut-band is om my lyf.
Sy is gou in die huis en haar suster
lê soos ’n rob rugkant na my
gekeer duskant die vlakkant
se inklimleer. Die son suig haar
soos met ’n strooitjie in straaltjies droog.
Ek spring en die ring
glip af om my bene. Ek gly
voete eerste onsigbaar weg
kom op, sluk water, kom op,
sluk water alles klankloos
kom op, sluk water wasig waar…
Dan duik sy in en red my rakelings,
maar my primitiewe brein
gee gretig vir my die doodstyding.
Diagnose: Walking Zombie Syndrome.
By die huis vertel ek my ma.
Sy neem kennis,
maar hoor nie.
(https://jorganharris.co.za/walking-zombie-syndrome/)
The AVBOB Poetry Competition reopens on 1 August 2024. Visit our extensive archive at www.avbobpoetry.co.za and find inspiration for your writing by reading the work of other poets in all 11 of South Africa’s official written languages. Follow us on social media for news, announcements and opportunities.