Gesigs leestekens/ lineamente
vir Breyten en my dogter, Kim
Lag-littekens
diep gegroef deur die wange
soos parentese: sy woorde kom
tussen hakies uit
(asof hy iets anders wou sê
en dit net bykomend is)
twee ore bevraagteken als
en trek dit in twyfel
maar die neus word uitroepteken as die mond pruil
om ekstra nadruk en gevoel te kry: pê!
en punte in die oë vorm ‘n slotsom.
Maar die onderstreping
om meer aandag te gee,
is onderstebo, op die voorkop
en beklemtoon… wat?
Gee my dan liewer
vir ‘n interessante onderonsie
dimorfiese dimpels in die wange,
poenankies wat soos kommas staan,
want dan gaan die gesprek
eenstreep deurlopend
steeds aan,
en aan,
en aan…
© Meyer van Rensburg, 2024