Die ganse van Meidoem
die ganse van Meidoem wei vir tyd en ewigheid
op die oewers van die verbeelding
grootlyf streeppens rooibors: van elk ’n tweeling
mik-mik hier na ’n insek pik-pik daar ’n blaar
wyd en syd gehuldig: eenvoudig wonderbaar
sierlik verbeeld in hul dinglikheid
verf van kalksteen hematiet malagiet met eierwit
die ganse van Meidoem wei vir tyd en ewigheid
’n oomblik vasgevang in hul kortstondigheid
’n paneel gekap uit Itet se grafkeldermuur
glo om te red en die vonds te laat voortduur
maar: ’n deel uit ’n geheel lei tot vrae en gevit
waar’s die werkers en die vangnet en die ploegosse?
die fries onvolledig uitgestal in die museum (oud of nuut)
steeds die onderwerp van velerlei dispuut
die ganse van Meidoem wei vir tyd en ewigheid
die sestal in hul uniekheid en hul sterflikheid
ondanks skend roof oorverf uitsterf en allerlei glosse
tog: só bewonderenswaardig
o ganse van Meidoem vlieg o vlieg
na die oewers van my verbeelding se gedig
© Ronel de Goede, 2024
Ek hou sommer baie van jou gedig Ronel. Baie geluk!
Baie dankie, Elmari. Jammer ek reageer nou eers.
Met waardering
Ronel
Bewonderenswaardig.
Baie dankie, Zandra.
Dankie Joan. Waardeer.
Dankie vir hierdie mooi besinning.