Goeie Vrydag
Voor die geboorte van lig en stof
voordat die blou sfeer helder sou hang teen
die spikkeltafereel en sweet
soos bloed in die tuin van olyf sou plof
voor die haan sou kraai en ontkenning
van Pilatus se hande sou drup
voordat ‘n sweep sou klap en skoon vlees
kloof in die voordagskemering
voor die las gedra sou word deur ‘n man
van Cirene, lank voordat dorings en spykers
deur vel sou skeur en die eerste saad
sou ontkiem het die Timmerman
in medelye dit alles geweet
en toe, noukéúrig, twee balke afgemeet.
© Stephan du Toit, 2025