Afrikaans
jy was my eerste woord
mý wêreld baar jy:
die duine van die kalahari
gemsbok en bakoorjakkals
swaar donderbuie wat weer
lewe in die oë van my pa slaan
ek ontwaak teen dagbreek
onder ‘n bitterbessieson
oor ver verlate vlaktes stap ek
jy maak my las ligter met stories
wat net jý kan vertel:
van die tannie met die pienk rok
en van ‘n hospitaal vol holbekke
ek sing van katbos en kambro
ek skryf my hart oop:
meestal grammatikaal
somtyds sonder fensie leestekens
ek glo aan die Woord
waarin jy my die pad wys
in jóú sal ek asem
op my laaste reis
© Stephan du Toit, 2025