Mafunyane
Tussen die Shingwedzi en Bububu
waar mopanie en knoppiesdoring staan,
sien ons die olifant die eerste maal
waar hy en sy askari op ons wag
en skielik weer in die ruigte verdwyn.
Met die lang tande bo die grond gehou
breek hy vervaard deur die savanneveld,
asem deur die wond van lank gelede
en kom in ’n rivierloop te ruste.
Veel later kom hiënas in die gras
rou bene van sy karkas af wegdra
en kou dit stukkend. Wit aasvoëlmis
aan ’n knoppiesdoring verraai dié plek
waar die grote in die stof gebyt het
en ons kan begin om met byl en mes
hom van sy dwase ivoor te verlos.
© Johann Lodewyk Marais, 2025