Reisiger
By Beit-el-Wadi
in die delta van die nyl
loop hy die tweede myl
verdwaal hy in ‘n storm
desperaat soekend na die kaart
wat word soos ‘n swaard
toegedraai in perkament
die skerpkant versigtig na binne
versplinter dit die hierogliewe
uit die laaste dinastie van taal
as die skadu van die piramied
trigonometries oor die woestyn val
en sy siel oopvlek
die lem op papier taai
en soet soos bloed
soos heuning in
die karkas van ʼn leeu .
sterk soos ʼn sharonroos
deur die binnewind verwaai
onder die vertroosting wat hy vind
in die skuim van warm bier
wat die droogte in die mond
soos ‘n woestyn ophelder
metamorf die interteks
in die binne van sy hart
as dit finaal uitmond
vol klingelende drifte
oppad na êrens
by Beit-al-Wadi
in die delta van die nyl
©Stefanus S Vivier