|
Sy dig sedert haar hoërskooldae en van haar gedigte is in Nuwe Stemme 5 opgeneem waardeur sy bewys gelewer het van haar vaardighede as digter. Kort voor haar dood in 2020 verskyn haar bundel Die waarheid oor duiwe, by Protea Boekhuis . Sy was getroud met Tony Ulyatt, en was deel van die vertaalprojek In a Burning Sea, met Marlise Joubert as samesteller. |
Gisela Ullyatt (1977 – 2020) is in Bloemfontein gebore en behaal die grade MA (Duits) en MA (Engelse taalstudie) aan die Universiteit van die Vrystaat. Sy behaal haar PhD (NWU) in 2013 en haar tesis handel oor die Amerikaanse digter Mary Oliver, gesien vanuit ’n Boeddhistiese raamwerk.
Uitgang
Hospitaal, eensame doolhof / êrens val lig in blokke
steriel die vloere / my hart klop elektries, iewers
naalde en bloedsusters. Ongesiens glip ek deur
vlakke van nabyheid en afstand / ongekend.
Môre / ’n dagreis ver en geruisloos soos wit
komberse. Moederowerste, agter poorte lê
pêrels en die vaak / jou kruise besweer niks
én alles / jou bidkrale klik stom.
Vader van pyn / jou vleishakies soos ’n Bacon-
skildery / Francis Francis, jou screaming pope
kasty en betig met vuur / maar ligjare verwyderd
van vlees reis ek over the rainbow
*
winter
winter is onversadigbaar
in blomloosheid in duifkarkasse
soos ’n grysaard mompel die wind
deur gaas in die spens die laaste lig
geleidelik verdof die middag tot iglo
ek skryf sondag-gedigte
aan die naderende koue
die koolstoof troetel
geheime teen sneeu
gedigte nes emmers
vang vuil sneeu op
om te vries
vir volgende jaar se somer
© Gisela Ullyatt, 2020