Henriëtte van Wyk

Henriëtte van Wyk

Henriëtte van Wyk is ’n gebore en getoë Namibiër. Sy matrikuleer aan die Hoërskool Mariental en studeer onderwys aan die Wellingtonse Onderwyserskollege in die Boland.

Mense, musiek, Afrikaans en haikoes is haar passie. “En my man …!”

In haar 33-jaarlange loopbaan van onderwyser het sy al enige vak onderrig (gr. 1 tot gr. 12) – net nie houtwerk nie! Daarvoor asook vir haar digkuns ontvang sy sedert 2007 verskeie ATKV-toekennings. Die kreatiwiteit van kinders voed haar siel.  “Ek beskou dit as ’n voorreg om die skrywer, redenaar of akteur te help ontsluit.”

Henriëtte is die stigter (2007) van ’n nasionale skole skryfkompetisie, WALTONS-GRIFFEL, en was tot 2011 aan spits van sake. Huidig is sy betrokke as beoordelaar in Digkuns Gr. 8 – 12. Henriëtte is sedert 2017 ook op die bestuur van die Windhoek Woordfees.

Sy skryf sedert studentedae, aanvanklik bloot om waarnemings en emosies op papier vas te vang.  In die 1990’s ontdek sy haikoes.  “Haikoes is my nis.  Dit is skaars vyf jaar gelede dat ek die skryf van gedigte ernstig begin opneem het.  Verskeie ATKV Pluimpie- en Veertjie-toekennings asook ’n digkunsskryfkursus o.l.v. Carina Stander in 2019 het my uiteindelik motiveer om verder te werk as net ’n vlugtige neerpen van woorde.”

Sy gee in 2016 ’n digbundel, Padhaikoes uit Namibië, uit.  Van haar gedigte is in 2018 en 2019 in Stemme uit Namibië 1 & 2 opgeneem.  In die 2019 Windhoek Woordfees Skryfkompetisie deel sy die tweede plek in Digkuns. Land onder woorde, saamgestel deur dr. Chrisna Buike-Muir, Senior Lektor (Afrikaans en Nederlands) aan die Universiteit van Namibië en medestigter van Windhoek Woordfees (2013), is so pas uitgegee.  Van Wyk se gedigte verskyn ook daarin.

Van Wyk beskryf haarself as iemand wat lief is vir stilte: “Stilte gee my krag”.

 

in die waan van nuttelose waarde

 

tuimel ‘n bruin blaar

na stilte onder broosdroog takkies

verby die aalwynblom en die vlinderkokon

tot waar die herfsmat oranje vlam

 

na stilte onder broosdroog takkies

soek die ontrukte en verwaaide

tot waar die herfsmat oranje vlam

en verdwaal in die wind se warrel

 

soek die ontrukte en verwaaide

want hul het die krag van behoort verloor

en verdwaal in die wind se warrel

in die waan van nuttelose waarde

 

want hul het die krag van behoort verloor

en sny die winterlug flenters

in die waan van nuttelose waarde

tuimel ‘n bruin blaar

 

*

 

binnekamer

 

ek maak die venster toe.

stilte tregter in –

ek skrik vir die harde klank

van my stadige aantrekvingers

 

*

 

  noem my Ek is

 

daar is iets

in die mirre van ‘n vars houtvlam

die vingers van die aandbries

die kweel van ‘n pietergeelgat

die kringe van kindergelag

die opaal van palmdadels

die borrel van die tuinfontein

die klingel van fyn klokkies

en die jubel van my wandelstap

 

*

 

  stappie om die blok

 

die halwe maan

gly luglangs

saam om die blok

 

lente lê

geel

in die voue van die paadjie

 

sipres se punt

haak ‘n weerhaan

teen die blou lug vas

 

verklaar die oggend heilig

 

 

©Henriëtte van Wyk

Bookmark and Share
  •