Posts Tagged ‘Vaal Reefs 10 Mei 1995’

Mellet Moll. Vaal Reefs, 10 Mei 1995

Monday, February 28th, 2022

 

 Vaal Reefs, 10 Mei 1995

 

Die aarde sal haar losprys hier verhaal

van hulle wat mekaar vol goud behang

die minnaars wat die dieper klowe delf

die wyses wat by pasgebore gode kniel.

 

Die aarde sal haar losprys hier verhaal

van hulle wat hul dag se brood verdien

die werkers wat haar binneholtes soek

die mynbestuur wat oor hul almal waak.

 

Die aarde sal haar losprys hier verhaal

in die tweede skag by Vaal Reefs-myn

waar die ontslape slagoffers vanaand

onder die puin van ’n vergane loko rus.

 

Ek sal ’n krans gaan neerlê vir die 104

siele wat vir ewig in haar gange dwaal

en met die unies en die shop stewards

sal ek deur Orkney met my fakkel loop.

 

En wens dat elke nagtrein slegs ’n reis

vir ontheemde pelgrims na hul tuiste is.

 

© Mellet Moll, 2022