Posts Tagged ‘Zikr deur Saleeha Bamjee’

Bamjee wenner van Ingrid Jonker-prys

Monday, July 13th, 2020

 

 

 

Mediavrystelling

Die wenner van die Ingrid Jonker-prys vir Engelse debuutdigbundels wat in 2018 en 2019 gepubliseer is, is pas aangekondig. Dit is Saleeha Idrees Bamjee se bundel Zikr.

Volgens ‘n beoordelaarsverslag dig Bamjee op aangrypende wyse oor verlange en verlies. Die vroulike liggaam – haar eie en dié van ander – word beskryf, terwyl sy die problematiek van Moslem-wees verken, met ‘n viering en verering van haar geloof en die Arabiese taal.

Volgens Bamjee se uitgewer, Nick Mulgrew van uHlanga Press, was hy onmiddellik beïndruk deur die tekstuur van Bamjee se gedigte, haar fotografiese instink vir beelde en haar bedaarde ingesteldheid by die beskrywing van hartverskeurende ondervindings.

Die Ingrid Jonker-prys word jaarliks beurtelings aan ‘n Afrikaanse en ‘n Engelse digbundel toegeken – die twee tale waarin Jonker geskryf het. Elf inskrywings is vanjaar ontvang en die kompetisie was straf. Die ander bundels op die kortlys was All the Places deur Musawenkosi Khanyile, Everything is a Deathly Flower deur Maneo Mohale en Skeptical Erections deur Mxolisi Dolla Sapeta.

Bamjee is ‘n fotograaf en skrywer van Johannesburg. Sy het ‘n MA in Kreatiewe Skryfwerk aan die Universiteit Rhodes behaal. In 2014 was sy die wenner van die Writivism-kortverhaalkompetisie.

Bamjee sal prysgeld van R10 000 ontvang, geskenk deur die Pirogue Collective.

Volgens die reglement moet die beoordelaars almal gepubliseerde digters wees, aangesien dit ‘n prys van digters aan digters is.Vanjaar was die beoordelaars Vonani Bila, Sindiswa Busuku en Wendy Woodward.

Ronel de Goede is die sameroeper van die Ingrid Jonker-pryskomitee. Finuala Dowling is die konvenor van die Engelse prys. Die ander komiteelede is Marius Crous, Kobus Moolman en Vincent Oliphant. ‘n Voormalige voorsitter, Danie Marais, tree as raadgewer vir die komitee op.

 

  •