Watter skrywer of digter se verstand kan súlke absurditeite verbeel?
Ek ry verby ʼn blinkswart BMW viertrekvoertuig met die nommerplaat “ENVY ME GP” terwyl ek iemand met longontsteking hospitaal toe neem. By die hospitaal aangekom (die Johannesburgse Algemene Hospitaal, of sommer Joburg Gen in die plaaslike omgangstaal), beland ek saam met ʼn lyk op ʼn trollie in die hysbak, op die maat van Kenny G se neulende saksofoon. Die portiere staan uitdrukkingloos met deurskynende plastiekhandskoene langs die trollie. Wie weet, dalk fladder die dooie stommerik se gees nog teen die dak van die hysbak rond.
Dit laat my dink aan die flou grappie oor wat Kenny G sê as hy by ʼn hysbak inklim: “This place rocks!”
Ek dink iewers lê ʼn gedig verskuil. Die rymwoorde is reeds daar: “Envy me”, “GP” (op Engels uitgespreek) en “Kenny G”. Sulke banaliteite kom reguit van die gode af. Maar om een of ander rede bly die vos uit die bos afsydig. Die papier bly wit.
Vanaand gesels ek met Riaan Grobler oor my digbundel Retoer en ʼn paar ander sake op RSG. Dit word so tussen 20:30 en 21:00 uitgesaai. ‘n Mens kan die onderhoud ook as mp3 op jou rekenaar aflaai en voor die tyd al daarna luister. Gaan loer hier in.