Op sy webtuiste vertel De Papieren Man dat daar onlangs in ‘n toilet in Oxford ‘n besonderse ontdekking gemaak is, naamlik ‘n eerste uitgawe van Charles Darwin se beroemde publikasie On the Origin of Species. Van hierdie boek, waarin hy sy ewolusie-teorie uiteensit en wat presies 150 jaar gelede, in 1859, verskyn het, is daar net 1,250 eksemplare gedruk. Vir jare – indien nie dekades nie – het dié ongelooflike vonds dus op ‘n boekrak in die Oxford-familie se gastetoilet gestaan sonder dat iemand besef het watter kleinood hulle in hul besit het …
Dié boek is eergister deur Christie’s op ‘n veiling aangebied. Die prys waarteen dit verkoop het, is £103,000 (ongeveer R1,3 miljoen!)
Mmm, nou ja toe. En waarskynlik is daar onder julle wat hier lees, diegene wat dink dat daar geen beter plek vir Darwin se boek kan wees as júís op ‘n stofdeurdrenkte rak in ‘n toilet nie … Skaam julle. Hoe dit ook al sy, ek sluit vanoggend se Nuuswekker af met iets wat ene Barbara Tuchman oor boeke te sê gehad het: “Books are the carriers of civilization. Without books, history is silent, literature dumb, science crippled, thought and speculation at a standstill. Without books, the development of civilization would have been impossible. They are the engines of change, windows on the world, ‘lighthouses’ (as the poet said) ‘erected in the sea of time.’ They are companions, teachers, magicians, bankers of the treasures of the mind. Books are humanity in print.”
En, natuurlik – ‘n boek kán jou lewe verander.
***
Op die webblad is daar vanoggend ‘n brief uit die buiteland deur Andries Bezuidenhout wat sy lot betreur dat hy nie vanjaar se Versindaba kan bywoon nie; hopelik is jóú omstandighede beter as syne en is dit wel vir jou moontlik om hierdie fees by te kan woon. (Ai, nog net één slapie, dan is dit sulke tyd.)
Mag hierdie dag gladweg uit sy skroewe kom vir jou.
Mooi bly.
LE