So elke nou en dan kom die SABC vorendag met briljante televisie. Gisteraand was dit weer so: die eerste episode van die reeds ‘A Country Imagined’, aangebied deur Johnny Clegg, het my vasgenael voor die kassie gehou. In hierdie reeks deurkruis Clegg die land op soek na kunstenaars wat op verskillende maniere op die Suid-Afrikaanse landskap reageer. Die eerste episode was propvol: onderhoude met (onder andere!) Hugh Masekela en David Goldblatt; beeldmateriaal oor James Philips en William Kentridge; en selfs ‘n besoek aan Totius se huis — waartydens Clegg een van Totius se gedigte in meer as bloot gangbare Afrikaans voorgedra het. Ek weet nie hoeveel episodes daar gaan wees nie, maar ek sal die kassie beslis van nou af Sondagaande met belangstelling dophou.
Ek was mal oor The Exploded View ook. 6 jaar by Rhodes Universiteit het my goed voorberei vir Stellenbosch: ek weet presies watter grammatikale aspekte van Engels ek nooit sal kan bemeester nie, so ek kry dit gewoonlik reg om hulle te vermy…
Whahahahaaaaa! My Engels is beslis ook nie goed genoeg vir Wits nie. Jy moet sien hoe die spiertjies in die wange spring as ek die split infinitive gebruik. Vladislavic se “Afritude Sauce” in The Exploded View gebruik ek as kruk as ek weens ‘n gebrek aan Sotho of Xhosa watertrap in een of ander vakbondkantoor op ‘n myndorp. Nou die dag in Carletonville juis ‘n rojale Afritude Sauce-dag gehad.
Daar is ook uit Ivan Vladislavic aangehaal, ‘n skrywer wat my amper oortuig het ek behoort Johannesburg toe te trek!!! Sy Portrait with keys… oi, wat ‘n boek. Clegg het self ook in die eerste episode in ‘n mynskag afgegaan, en toe baie treffende kunswerke deur veral swart SA kunstenaars uit die apartheidsera gewys, met die myn en mynwese as tema. Ek sou nou summier vir jou werk by die US aangebied het, maar ek weet nie of jou Engels goed genoeg is nie. 😉
Desmond, dit klink ongelooflik. Kentridge oor Johannesburg as landskap is nogal kostelik. Vlgs hom is die stad hier weens geologiese redes (goud onder die grond), nie geografiese redes nie (riviere, berge). Johannesburg gaan dus oor wat ONDER die grond/landskap gebeur. Maar dalk is myntonnels ook landskappe. Stad van die underground. Ek moet hier wegkom! Aan die ander kant: “Die w^reld is maar orals halfpad hol,” om Koos Doep aan te haal.
Wat ek van hou, is dat ‘landskap’ breed geinterpreteer word: nie net berge en dale nie, maar ook stasies en strate.
Ek is oortuig die hele reeks sal op dvd uitkom. Dit is deur dieselfde mense gemaak wat ander dokkies, soos Tobias’ Bodies, gemaak het. Ek sal self ook verkies om die hele reeks op dvd te kry, sodat ek dit rustig en sonder belaglike SWC2010 advertensiebreke kan kyk!
Hopelik kom dit op DVD uit. Anders sal ek ‘n TV moet aanskaf.