Ek is seker niemand wat hier lees gee regtig om wat ek met my naweke aanvang nie, maar ek gaan julle nogtans vertel. Sondagoggend het ek en Claire die Taalmonument in Paarl besoek. Dit was haar eerste keer, en my eerste keer in jare — en ek verwys nou bloot na besoeke aan die Taalmonument, ugge-um. Ek wou eers by die hekke omdraai — ons het eintlik bloot vir ‘n ‘drive’ gegaan en so half toevallig op Paarlberg beland — toe Claire voorstel ons moet die R12 per persoon betaal, en bietjie gaan loer hoe lyk dit binne. Ek was inderdaad bly dat sy my omgepraat het! As ‘n monument is dit dalk nie die mooiste struktuur wat ek al ooit gesien het nie, maar dit is sekerlik ook nie die lelikste nie. En dit is beslis niks om oor skaam te wees, of onnodig honend nie. Die uitsigte vanaf Paarlberg en die terrein se lieflike tuine en grasperke maak ‘n besoek egter beslis die moeite werd. Volgende keer gaan ons vriende saamnooi en ‘n piekniek op die gras hou!