Plekgedig 39: Marie Bosman. Sunnyside

Sunnyside

 

Dis die son se kant dié

Jou strate netjies gematriks

Sodat besige amptenare

Mooi mammas en elite skoolkinders

Skoon vier by viers preuts kan ry

Van Menlopark na die middestad

Oor Muckleneuk na die Uniegeboue

Ver van bosse en modderpaaie

Pretoria se eie klein betonoerwoud

 

Sonnige sypaadjies omsoom

Winkels banke kafees King Pie

Maak plek vir groenteverkopers

Een se naam is Innocent

Hy weet van al die skadu’s

Sy kartondoos slaapkamer

Gomgeure in die oggend

Hoek van Steve Biko en Kotze

 

Soms verdwyn die sonkant

Soos ‘n wintersaand

Met jasse kom ons uit die kerk

Kruip tussen komberse in

Langs warmwaterbottels

Die volgende oggend het jou koue kant

Vier straatkinders finaal verkou

Ek kon my jas vir hulle gaan gee het

As ek die son in my hart onthou het

 

Sonnige kant

Met jou kerktorings en woonstelblokke

Kunstige Gerhard Moerdykstraat

Padnoller na Joubert

Daar het ons kinders gespeel

In blokkies son agter die diefwering

Tot die nagskootklappe en gille

Ons herinner het

Dat die son elders ook skyn

 

 

Bookmark and Share

Comments are closed.

  •