ORDE VAN DIE BEITELTJIE 2015
Dr Fanie Marais is sedert 1990 aktief betrokke by die bevordering van Afrikaanse woordkuns met veral klem op ontluikende woordkunstenaars. Dit het in 2000 die oprigting en befondsing van Cordis Trust met slagsin uit die hart tot gevolg gehad met oogmerke deernis-, Afrikaanse woordkuns- en geestelike projekte. In 2010 is begin met Orde-toekennings in woordkuns (24 tot op datum). In 2011 is Cordis Trust Publikasies as nie-winsgewende nisuitgewer geskep om meer geleenthede te bied, veral vir aspirant-woordkunstenaars. Met die aanbreek van 2015 kyk hy terug op 25 jaar van persoonlike betrokkenheid, waarvan 15 jaar as uitvoerende trustee van Cordis Trust. By dié geleentheid word talle orde-toekennings gedoen, waarvan die Orde van die Beiteltjie ‘n nuwe inisiatief is.
Een van die mikpunte van die Cordis Trust is die bevordering van die Afrikaanse taal deur skeppende werk in die dig-, prosa-,drama-, lirieke en beeldende kuns en kultuurbevordering te fasiliteer, aan te moedig, te beloon, toegang tot publikasie te verleen en talentvolle potensiaal te identifiseer en ontwikkel.
ORDE VAN DIE BEITELTJIE 2015
DEURLOPENDE YWER IN DIE BEVORDERING VAN AREAS VAN DIE AFRIKAANSE WOORDKUNS
Uysie Alberts
Ywerige fotograaf (met plasings op www.mylandsa.co.za) en digkunsbydaes (fb Puur Plesier)
Nini Bennett
Gepubliseerde skryfster/digteres en Carpe Noctem Digakademie. Wenner RAU debuutprys
René Bohnen
Gepubliseerde digteres, mentor vir aspirant-digters, navorser
Marie Bredenkamp
Digteres, persoonlike blog Sprokkelhout en Splinterglas, aktiewe deelname en mentorskap van die fb digblad Puur Plesier
Kobus Burger
RSG Dramakuns
Annalie Calitz
Digteres (o.a.Die Woordgilde), afgetrede bibliotekaresse, met gemeenskapsbetrokkenheid
Clinton du Plessis
Bekende digter met talle publikasies
Rev Roy Glover & Susan
Bethesda gevangenisbediening en toepaslike Christelike publikasies
Lisa Hänggli (Lorenz)
SA gebore operasangeres in Zurich. Skepper van mondverse, toonsettings van Afrikaanse gedigte
Martin Jansen
Radio Pretoria, bevorderaar van woordkuns
Leti Kleyn
Bekende in woordkunsbevordering, skryfgids, nuwe stemme en aktief in gemeenskapsbetrokkenheid
Jopie Koen
Sinoniem met teaterwerk (sedert 2003 Pierneefteater) en gemeenskapswerk. Medewerkster van Cordis Trust sedert die stigting
Helena Liebenberg
Taalkundige, digteres en navorser in die brontaal. Stigterslid Tracing History Trust
Myra Lochner
Kreativ SA uitgewer, skryfterapie en gemeenskapsopheffer. Skryfster/digteres en Outeur van Wonder in 2014. Stel saam en publiseer kwartaalliks Toek-A-frikaans (kultuurhistoriese gedigte en vertellings). Medewerkster van Cordis Trust sedert die stigting
Danie Marais
Gepubliseerde digter, keurder en bestuurder PEN Afrikaans
Mellet Moll
Stigter Carpe Noctem digbevordering, debuut drieluik 2014 Heilige Meetkunde, Swanesange en Nalewe.
Jo Prins
Boekeredakteur Media 24
Ian Raper
Akademikus, digter (Oorlopers) , aktiewe bevorderaar van dig- en skryfkuns en die eienaar van die onafhanklike uitgewer Rosslyn Pers
Ilse Salzwedel
Skrywers en Boeke, RSG
Lieze Stassen
Sangeres en Liriekskryfster
Gisela Ullyatt
Akademikus en aktiewe bevorderaar van Afrikaans op verskillende platforms
Karlien van der Merwe
Gepubliseerde skryfster/digteres, met gemeenskapsbetrokkenheid
Annemarie van der Walt
Vryskutskrywer, gereelde rubrieke in Beeld
Lidi van Schalkwyk
Veelsydige skeppende kunstenaar met woord in beeld
*
(c) Trust IT 175/00 NPO 066-689
16 Februarie 2015
Geluk aan aan al hierdie, om dit in Ina Rousseau se “Klip” se woorde te stel:
“Katerdrale en kruike,
Sonnewysers, suile,
Rotse en obeliske”
wat “hulle vorms” van Afrikaans so
“Teen die eindigheid
Uit”
“beitel”!
Cordis Trust begryp duidelik iets van die “naby, baie naby aan die aarde” klipperige karakter (vergelyk Derrida se opstel “What is poetry?”) van Afrikaans (Derrida vergelyk posëie met ‘n krimpvarkie wat ‘n snelweg kruis en wat, as hy die gevaar hoor nader kom, homself oprol en sy penne wys!).
Ontsaglik trots op die beitelaars … Cordis Trust en Fanie Marais verdien applous! xxx
Geluk. Dankie.
Geluk aan al hierdie voorbeeldige beitelkappers. Julle is die sout van die taal wat menswees smaak gee!
Baie dankie aan Dr Fanie Marais en Cordis Trust vir hierdie groot eer en voorreg wat my te beurt geval het … “soms raak my sinne kort, my note min, my woorde op” … hierdie is een van daardie kere. Baie geluk ook aan al 24 ander Beiteltjie-draers. Afrikaans is my hart se taal, my moedertaal … my taal. My note is die voertuig van my en ander se woorde.Wat ‘n voorreg om deur musiek nuwe harte te kan oopsluit vir my taal.
Tikfoutjie: “ontvangers” 🙂
Baie hartlik geluk aan al die ontvangers van die Orde van die Beiteltjie!! Geluk ook aan Cordis Trust vir die wyse waarop bydraers aan die bevordering van Afrikaans erken word, sowel as die geleenthede wat Cordis Trust skep. Mag julle voortgaan met slypwerk. Ek is bevoorreg om die meeste van die ontvangs persoonlik te ken.
‘n Inisiatief soos dié is waar ons vordering maak: daar word nie net oor Afrikaans gepraat nie, maar daadwerklik iets gedoen. Afrikaans word letterlik uitgebeitel uit vele fondamente. Dalk begin ek nou eers iets van Van Wyk Louw se’ beiteltjie’ verstaan, wat ek twintig jaar terug as voorgeskrewe gedig nie kon begryp nie. Afrikaans is die kokende see, die afgrond, maar ook die spleet deur die aardkors (die zen van die woordbrein?) Mag jou beiteltjies nóg groter woordklippe kap, Fanie Marais. Geluk aan al die ontvangers.
‘n Kwarteeu van deernis en uitnemedheid. My hartlike gelukwense aan Fanie Marais van CORDIS TRUST, wat stukrag gee aan skep, en aan elke Orde-ontvanger en -medewerker, wat deur hul dagtaak die Uit-die-Hart-gesindheid leef. Maak ‘n verskil, nie net daar waar die beiteltjie klink nie, maar ook daar waar die hart verslae is en waar hoop taan. KREATIV-groete, Myra