Wicus Luwes. Gedistilleerde woorde

Bote is allergies daarvoor, maar Whiskey-drinkers is nie bang om hul drankie op die rotse te geniet nie.  Ek het ‘n onlangse gesprek oor ‘n Whiskey-klub nogal interessant gevind. ‘n Neef aan my vrou se kant was deel van so ‘n klub en het een maal ‘n maand ‘n nuwe Whiskey uitprobeer. Die eerste vraag is blykbaar of jy Skotse of Ierse Whiskey wil ondersoek. Uit die aard van die saak sal jy die bietjie duurder Whiskeys by so ‘n klub probeer bespreek, maar gelukkig word die kostes tussen die vier of vyf mense in so ‘n klub gedeel. Die peuselhappies moet ook aanpas by die soort Whiskey, want die verskillende soorte ontleen hul tot verskillende geleenthede en kossoorte. (Prent hierbo: Kaptein Haddock van Kuifie-faam is een Whiskey-drinker wat Whiskey en bootreis met gemak kombineer.)

Die Whiskey word met die eerste rondte net so skoon genuttig. Die gasheer vir die aand bespreek ‘n bietjie informasie oor die streek waar dit gemaak word en lees meer oor die geskiedenis van die handelsmerk. Elke persoon skryf hul ervaring van die drankie neer en gee dit ‘n punt. Tydens die tweede rondte word die Whiskey met ys/Eish genuttig. Ander bymiddels, soos bv. sodawater, word tydens die derde rondte bygevoeg. Op so ‘n manier leer ken ‘n mens Whiskeys wat jy andersins sekerlik nooit sou oorweeg het nie.

 

Onder In My Whiskey Glas
deur Koos Kombuis

Onder in my whiskey glas sien ek jou weer
onthou ek hoe ons was, maar nou’s my hart so seer
Die kroeg se deur is toe, wasem hang in donker lug
Ek lig my glas op om te proe, maar voor my sien ek jou gesig

Refrein:
Onder in my, onder in my,
onder in my whiskey glas
is jy nog aan my vas

Ek het jou verruil vir die droom van ‘n duisend kontinente
maar nou sien ek my glas se boom en ek tel my laaste sente
Jy’s orals in my hier vannag, ek voel jou in my lewe
whiskey is hard en jy is sag, jy is bo drank verhewe

Drie skepe moes my wegvoer na lande ver van hier
maar daar’s skimme op die vloer en visioene in my bier
Ek weet ek was verkeerd gewees, my oë traan, my maag wil draai
my drome was nog vis nog vlees, drie skepe het my hart verraai

 

Die proses om drank te maak het my gefassineer omdat dit soveel raakpunte het met skryfwerk. Die keuse van bestanddele speel ‘n rol in die finale produk. Elke streek maak hul Whiskey ‘n bietjie anders as die volgende streek. Die deel wat my egter laat dink het, was die distillasie-proses. Daardie herhaling en uitsif om die perfekte produk te verkry. Skrywers weet maar te goed van hierdie uitsif-proses. Daar is seker mense wat Whiskey net vir hulself maak, maar die lekkerte daarvan lê tog daarin om dit met ander mense te deel.

 

Bluebird
deur Charles Bukowski

there’s a bluebird in my heart that
wants to get out
but I’m too tough for him,
I say, stay in there, I’m not going
to let anybody see
you.
there’s a bluebird in my heart that
wants to get out
but I pour whiskey on him and inhale
cigarette smoke
and the whores and the bartenders
and the grocery clerks
never know that
he’s
in there.

there’s a bluebird in my heart that
wants to get out
but I’m too tough for him,
I say,
stay down, do you want to mess
me up?
you want to screw up the
works?
you want to blow my book sales in
Europe?
there’s a bluebird in my heart that
wants to get out
but I’m too clever, I only let him out
at night sometimes
when everybody’s asleep.
I say, I know that you’re there,
so don’t be
sad.
then I put him back,
but he’s singing a little
in there, I haven’t quite let him
die
and we sleep together like
that
with our
secret pact
and it’s nice enough to
make a man
weep, but I don’t
weep, do
you?

 

Dit is ook so dat die mens van die vroegste tye af te diep in die bottel gekyk het. ‘n Skrywer weet waar die punt in ‘n sin moet staan. Een klein kolletjie maak of breek ‘n sin. (Miskien is dit waarom digters spaarsamig met punte en kommas werk.) Om na die distillasie-proses terug te keer: Ek sien in my gedagtes daardie vlam van die distillasie-proses en die klein druppels wat vorm. Die woorde word suiwerder, sterker en minder soos wat die proses herhaal. Mens is geneig om te sê ‘nugter weet’. Ek neem aan dat die eindproduk van die distillasie-proses iets met die oorsprong van ‘nugter weet’ te doen het. Die teendeel sal seker wees dat ‘dronk nie weet nie’ of miskien het nugter met meer as net die afwesigheid van drank te doen. Ek wonder ook waar nugter in die tydsverloop inpas. Ek het dit al voorheen genoem, maar ‘n vriend van my vra altyd rondom die braaivleisvuur: ‘Ek wonder hoekom hul die planne in die onderkant van die bottel versteek?’ Dit word natuurlik grappenderwys bedoel, maar nugtere denke se stories is soms maar ‘n bietjie vervelig.

 

Simposium
deur Koos du Plessis

Ons sou nog kon brabbel … Goed: filosofeer …
oor dit wat nog kom, of dit wat reeds was;
Maar een kwyn van woorde; die ander word meer.
Dus swyg ek … en skink nog ‘n uur in my glas.

 

Die bestanddele van die beste drankies is nie vir die meeste mense belangrik nie. Daar is net enkeles wat die resep wil hê. Daar is party wat drankies in hul kele afgooi sonder om eers die smaak te ervaar en ander wat elke druppel waardeer. Die hoeke van die ys word ronder gesplyp deur die gedistilleerde woorde in die glas en word uiteindelik deel van die drankie.

Nugter

ek is ontnugter deur die oggend
wat homself as middag vermom
en hom dan verbeel dat ek
dit net so stil verby sal laat gaan

ek is ontnugter deur die skerp geraas van gordyne
en die strale van die son
wat buig om die rante van my donkerbril

die dors wat nugter weet waarvandaankom
lei my na eindelose wasbakke en yskaste
maar die krane ken geen dors nie
en die ys breek nie die sweet nie

die dors skuil nie in die glas nie
ook nie in die bottel nie

die dors skuil in die ontnugtering

 

Manet – A Bar at the Folies-Bergère

Bronne:
1. Du Plessis K. 1995. Skink nog ‘n uur in my glas. Kaapstad: Queillerie-Uitgewers
2. Internet: http://www.allthelyrics.com/lyrics/koos_kombuis/onder_in_my_whiskey_glas-lyrics-1247344.html
3. Internet: http://www.poemhunter.com/poem/bluebird/

Bookmark and Share

5 Kommentare op “Wicus Luwes. Gedistilleerde woorde”

  1. marlise :
  2. Wicus Luwes :

    Dankie vir die skakel na die blog. Het lekker gelees. Pragtige gedig.

  3. Leon Retief :

    Wicus self drink ek nie whiskey nie maar ek het ‘n vriend wat enkelmout whiskeys versamel. Toe ek laas getel het, dis nou al paar jaar gelede, was daar 254 verskillende soorte in sy versameling, sommige van stokerye wat nie meer bestaan nie. Is jy jaloers?
    🙂

  4. Leon Retief :

    Wicus daai skildery van Manet het my laat dink aan absint – as dit nou die regte spelling in Afrikaans is. Genoemde vriend van my het verhuis na Frankryk waar hy nou absint stook en handel dryf in al die parafernalia wat met die konsumpsie van hierdie drankie gepaard gaan. Indien jy belang stel, kyk gerus na:
    http://www.oxygenee.com/iframe-5/iframe-17/
    en scroll af na onder, verby die kredietkaarte en dinge. Verbasende versameling.

  5. Wicus Luwes :

    Sjoe Leon. Indrukwekkende versameling en absint-blad. Daar is ongelooflike wêrelde reg rondom ons. Dankie hiervoor.

  •