Wicus Luwes. Jou naam as metafoor

jane-austen-names-small

Sy name was Andries Lodewicus Stefanus, maar die mense het hom Boet genoem. Ek verwys nou hiermee na my oupa – die een na wie ek vernoem is. Ek dink dikwels daaraan dat ek ook Andries gedoop kon gewees het, of Stefanus. Natuurlik kon ek ook Dries, Stefan, Stef of Boet geword het. Ek het op ‘n stadium baie met mense se ID-dokumente gewerk. Tant Sannie se naam is eintlik Francina Jacomina volgens haar ID-boek. Kleinjan se name is eintlik Jan-Hendrik. Daar is tye wanneer ek bly is dat ek net een naam het. Dit is nou veral wanneer ek vorms invul. Daar is altyd oop blokkies op die vorms wat ek in moet vul. ‘n Spasie waar ‘n naam kon gewees het. Ek dra nie swaar aan my naam nie. Ek wonder of my kleinkinders, indien die tyd sou kom, ook Lodewicus of Wicus gedoop sou word. Miskien is ons op daardie tydstip slegs nommers of IP adresse. Miskien hou my kinders meer van ‘n ander naam op daardie stadium of word geen seun in die volgende geslag gebore nie.

Die akteur, Michael Caine, het onlangs sy naam verander. Sy doopname was Maurice Micklewhite, maar dit het lughawebeamptes, wat Al-Kaïda of ISIS probeer vastrek, gereeld snuf in die neus gegee. Hy moes al ure lank by lughawens vertoef terwyl amptenare sy identiteit verifieer. Maurice het Michael geword en sodoende die verhoognaam as sy eie geneem. Dit is in ‘n sekere sin ‘n identiteit wat hy vir homself opgebou het. Hy het sy ander naam of tweede naam dus self gekies. Hy is eintlik al van die 50’s af Michael Caine, maar het dit eers op 83-jarige ouderdom offisieël gemaak

Aan die anderkant van die see was daar weer die Amerikaners wat op ‘n stadium slegs voorletters vir tweede name gebruik het, sonder dat daar werklik ‘n naam vir die voorletter sou wees. President Harry S Truman se ouers kon nie besluit watter grootouer om klein Harry na te vernoem nie en aangesien beide grootouers se name die letter ‘S’ ingehad het, het hul besluit om slegs ‘S’ te gebruik as plekhouer vir beide name. Die skrywer F Scott Fitzgerald, gebruik ‘n karakter wie se naam hom ver vooruitloop in die boek, the Great Gatsby. Die naam bou sy eie identiteit op, intrige deur middel van ‘n naam. Die leser word stelselmatig ingetrek deur ‘n karakter wie ‘n nuwe naam (of tweede naam) en ‘n nuwe identiteit aangeneem het. Etienne Leroux het ‘n soortgelyke intrige geskep met sy Salome Silberstein-karakter, maar die ontmaskering of bekendstelling van Salome laat meer vrae as antwoorde.

Ek het op ‘n stadium ‘n vriendin gehad met ‘n selfoon-adreslys sonder gelyke. Daar was net name soos Vleis of Stokkies of Meerkat op haar kontak- of adreslys. Ek moet byvoeg dat dit in die dae was toe jy slegs agt of tien karakters op selfone kon stoor, maar ek het dit nogal interessant gevind. Ek het ook al gehoor dat party skole die Graad Agts of ou Standerd Sesse byname gee. Party van hierdie byname bly daarna lewenslank by ‘n mens en die klasmaats en vriende van ‘Stokkies’ weet partymaal nie eers wat die persoon se ‘regte’ naam is nie. Vir ‘n oomblik wonder ek of my naam as ‘Stokkies’ of ‘Vleis’ of ‘Brilletjies’ op iemand anders se selfoon gestoor is.

Hy het hom toe gevra: “Wat is jou naam?” “My naam is Legio,” antwoord hy Hom, “want ons is baie.” – Markus 5:9

Op party adreslyste is ek dalk ‘Wicus Lift’ of ‘Tennis Wicus’. Ek vermoed ek is ‘Vikus’, ‘Wikus’ of ‘Wickus’ op heelpartyjie fone se adreslyste. Ek vermoed ook dat geen burgerregte-organisasies gaan veg vir my ou of nuwe name nie. Daar is tweede name op jou rybewys, maar dis nie noodwendig die naam wat mense vir jou gebruik nie. Jy het meer as een naam, sonder dat jy altyd doelbewus daaraan dink. Die probleem is dat jy nie altyd beheer het oor daardie naam nie. Miskien het jy teen die tyd besef dat jy nie veel sê gehad het in die besluit oor die eerste naam wat jy gekry het nie.

Baie van die oorspronklike Kaapse slawe het hul van of tweede name gekry deur middel van die maand waarin hul in die Kaap via skip gearriveer het. Ek het onlangs ‘n interessante radioprogram oor slawegeskiedenis geluister. So het party mense met die van ‘February’ in Februarie-maand ‘n nuwe identiteit kom kry met die gee van ‘n van of tweede naam. Hulle het ook ‘n nuwe gedeelde identiteit met mense gekry wat voorheen nie hul familie was nie. Al die ‘February’ arriveerders was tog nie van dieselfde familie nie, maar hulle het op ‘n tydstip saam aan ‘n lot of juk begin dra.

Vir die wat my nie ken nie:
Aangename kennis, my naam is Wicus.
Somtyds definieer ek my naam en ander kere word ek deur my naam gedefinieer.
Somtyds is ‘n naam die metafoor en ander kere word die metafoor ‘n naam.

Probeer gerus die volgende eksperiment saam met my:
Sit eers jou digtershoed op.
Wat is die vanne wat by die volgende name pas?
Andries, Johann, Louis
Sit nou ‘n sportkritikus se hoed en dink weer watter vanne by die name sal pas.
Herhaal ook met ‘n vriendskapshoed?
Het die vanne dieselfde gebly of het dit verander?

Ek het gewonder oor die naam as metafoor terwyl ek aan die volgende gedig gewerk het.
(As jy as leser ook met ‘n naam as metafoor wil eksperimenteer, sal ek dit graag wil lees.)

 

 

Mzansi as ‘n sprokie

Mzansi is Alice se haastonnel
wat krimp met ‘n Krog-mondspoel
en groei met elke Adriaan Vlok-was.
‘n teeparty waar koningin Mbete
haar Grinnik-kat streel
ten aanskoue van ‘n hoedmaker
in ‘n rooi beret

Mzansi is ‘n Grimm-maaltyd
wat te warm is om te kou
mea culpa sê die baba beer
terwyl die lepel val
mea culpa sê sy moeder
terwyl sy ‘n lap gaan haal
mea culpa sê Gouelokkies
terwyl sy gereed maak om te vlug
maar pappa beer bly stil
terwyl hy die pot styf
in sy kloue hou

 

Bron van prent:
Internet. http://www.babynamewizard.com/archives/2014/7/the-jane-austen-name-report

Bookmark and Share

3 Kommentare op “Wicus Luwes. Jou naam as metafoor”

  1. Joan Hambidge :

    Die twee belangrikste deeltekens in Afrikaans is op hoërskool en poësie.
    Beslis nie op definieer of verifieer nie.

    definiëring wanneer een e verdwyn

    https://nl.wiktionary.org/wiki/definieer#Nederlands

  2. Waldemar Gouws :

    Joan, die voels en enkele uithaler vliee snork vir jou oenskynlike diakritiese vooroordeel t.o.v. generiese dierese. Of die reels nou op of af van die stokkie is, bly Philip Rawson se beskrywing waardevol vir enige muur: “Words do not carry meaning like trucks carrying bricks.”

  3. Wicus Luwes :

    Het nou lekker gelag. Ek stem saam dat daardie woorde se deeltekens bitter belangrik is. Onthou om ‘n gedig wat ‘n naam as metafoor gebruik met ons te deel.

  •