Wat is plagiaat? Die pas hersiene lemma deur Ronél Johl daaroor in Literêre terme en teorieë (LTT) gee ‘n prikkelende ander kyk daarop en bevraagteken onder andere die metafoor van diefstal. Johl skryf ook:
“Die geskiedenis van die moderne literêre gebruik van die term wys dat dit sedert die agtiende eeu selektief in die kritiek aangewend word om groot skrywers se kreatiwiteit en oorspronklikheid aan te prys en mindere skrywers tot die vergetelheid te relegeer.”
Lees verder by
http://www.litterm.co.za/index.php/lemmas/33-p/1574-plagiaat-2.
Literêre terme en teorieë, ‘n omvattende ensiklopedie van literêre terme in Afrikaans onder redaksie van T T Cloete, het in 1992 by HAUM-Literêr verskyn. Dit is lankal uit druk, maar ons het dit vanaf 2009 gedigitaliseer en dit is sedert 2015 gratis aanlyn beskikbaar by www.litterm.co.za. Die teks van die 2007-uitgawe van Van Gorp et al. se Lexicon van literaire termen maak, met die goedgunstige toestemming van die outeurs, deel uit van LTT aanlyn. LTT is daarom ‘n onskatbare bron van literêre kennis en literêre begrippe in Afrikaans (en ook in Nederlands).
LTT word tans hersien en bygewerk danksy ‘n ruim finansiële toekenning van die Suid-Afrikaanse Akademie vir Wetenskap en Kuns. Plagiaat is die jongste hersiene lemma wat geplaas word.
Kommentaar op Plagiaat en op LTT in die algemeen is welkom. Ek is veral op soek na medewerkers vir die verdere bywerking van LTT. As jy ‘n goeie stuk oor ‘n belangrike literêre begrip êrens in jou rekenaar (of laai) het, laat my weet. Dan kan ons dit vir LTT oorweeg. Ek kan ook vir jou ‘n lys van lemmas stuur waarvoor ons nog skrywers soek.
Hein Viljoen
LTT webadres: http://www.litterm.co.za/index.php
Baie dankie vir die plaas van ‘n meer in diepte kyk na plagiaat. http://www.litterm.co.za/index.php/lemmas/33-p/1574-plagiaat-2
Dit was altyd in my kop toe ek begin probeer het om kreatief te skryf. Ek het later net gedink: as dit iewers ‘n klok lui, gaan kyk maar weer daarna, probeer dink waar dit vandaan kom, stel dit anders, en so aan.
Maar hoe interessant en verligtend om te lees met veral die treffende aanhaling van Jonathan Lethem aan die einde.’n Stukkie wat ek bêre en nog lekker diep oor gaan… nadenk.