N.P. van Wyk Louw 50. Ronel de Goede
Jezus Christus offert zijn bloed voor ons
Gustave van de Woestijne
wie hy ook al was
maagdekind timmermanstelg
storieverteller wonderwerker
relskopper minnaar
of te not
of hy was wat hy was
wysgeer gesalfde geofferde
of hy is wat hy geword het
die een wat godseun genoem word
traak my nie juis nie
maar wel
die rooi oë van
hierdie skildery
stories en verse
met of sonder leestekens
om só gestipkyk te word
deur ’n paar aardebruin oë
kykers blink van swartgeit
nie skrilsoet neergeslaan nie
ook nie jakopewer-strak nie
om só aangegryp te word
deur ’n geamputeerde genaelde
rooi aartjies in die oogwit
sakkies blouswart kringe
grimgesig wringlyf
om só uitgedaag te word
deur ’n rooi-oog woordlose
die lippe die liggaam vertrek
met uit die hart die vrymakende
saadstorting
om só vasgenael te word
deur ’n priemblik
bo-oor twee bleek madonnas heen
hul hande leë bakkies
betekenis
een wat opkyk
die ander in die niet na sy lendene
gevul met vrae
’n broodjie ’n vissie
as hulle is wat hulle was
is jy nou tevrede
oor die offer
as jy is wat jy is
as jy is wat hulle sê jy is
god
© Ronel de Goede, 2020
Dankie, Ronel: hier breek jy onbekende, verre grense oop na beter begrip van Louw-laatwerk, met die beeldende oog-gedig van de woestijn. En vir jou:
Ouklip
(klein hulde, groot meester)
wis suiwer voor spel:
my ei-fees kwelkrip
(klier-pik lip-erk klipkerk)
ge-root dood
ge-roet brein
brei-in bruid
bruin-oog
(git)
Rooioog
(God)
woord-eind
naak
dein
– Lizzie Jantjies (31 Julie 2020)
Dankie, Helize. Groete, ook aan Lizzie.
R