AVBOB-Poësieprojek 2019. I wish I’d said, Vol. 3: Opdraggedig
Agterplaas
die wind is beterweterig vanaand
die buurt se kleure diep
die grasperk, vibacreet is anoniem
daar is ‘n wye soort paniek
terwyl vandag homself in gister omsit
nou
die oomblik staan voor my
hier by my agterdeur
net soos ‘n hoflike teleurstelling:
“jammer jong
oor hoe dit als so droewig is soms
oor jou vriend se kankerdiagnose
oor jou suster en haar huilery
oor al die ernstige politieke skokke elke week”
ek knik
dat ‘n moment
so sommer voor jou deur kan staan en met jou praat
is wonderlik
net totdat dit verdwyn
en jou aan al die laters oorlaat
© Loftus Marais, 2020
Volg die onderstaande skakel om in te skryf vir die 2020-Avbob Poësiekompetisie. Groot kontantpryse kan gewen word:
https://www.avbobpoetry.co.za/?gclid=Cj0KCQjwy8f6BRC7ARIsAPIXOjgcXTaM8K11Sp2Zrq7gSws15ib4w4i2bySQ_
AioG2iNlcmBSb0OhiQaAmqpEALw_wcB
(Hierdie is een van die 12 opdraggedigte wat deur AVBOB van 6 Afrikaanse digters aangevra is vir die bundel I wish I’d said, Vol. 3 (Naledi, 2020). Die gedig verskyn nie in die bundel nie, maar ‘n ander gedig van Loftus Marais verskyn wel.)