Joan Hambidge. Digteres as huisvrou

 

Digteres as huisvrou

 

‘n Wasmasjien stollend

op ‘n wintersoggend

neem my weer eens

na die skryfproses

as huishoudelike take:

 

die stofsuier hiperbolies swanger

die kombuiskaste kraak

snags in oorvloedige niksheid

halfleeg die wyn bottels

aans gekurk neffens gemufte kaas

en rens melk vergete in die yskas,

‘n klein Antarktika.

 

Van uitstel kom optel,

dink jy, en hierdie gedig,

grocery shopping

made fast and easy …

 

Ek bestel via Mr Delivery:

1 litotes

‘n halwe sakkie ironie

‘n skeutjie satire

en ‘n sak vol intertekste

 

vir besinning oor

nog ‘n vroulike aanvulling

se selfgerigte vervulling.

 

 

© Joan Hambidge, 2021

 

Bookmark and Share

Los kommentaar

 

*