1
Vanaf genesis tot apokalips
dwaal die ou nar deur die gebombardeerde stad
blou, die sneeu bedekte katedraal se gesange
slip om sirkel en deur melkblom flenters
blou muurpapier en asvaal laning
hanswors val onder ’n rooi sambreeltjie
toe die duif oë knip vir die vreetmasjien
en die sirkusolifante trompetter
panservoertuie, afgryslike besitname
bloed vloei skandelik oor die asfalt
’n bittere verlies, skandelike oorlogskrete
ag tog, die skare op sneeubedekte pleine
stad uitgewis, uit gesis, deur blou aar kneukelhande.
2
In die hart van die orrel hoor
ek gotiese klanke; duifvlerke
fladder teen wasige brandvensters
en ek ruik wierook aan jou hande
is dit Bach wat reën versamel in die kantate?
Swart bos blomme word sonates waar ek skuil
ruik weer die wierook aan jou hande, sluit my oë
daar is dié swart wolf, dié een met ysswart stewels
terug na die mis in B mineur
Lief, wierook aan jou hande.
3
Vanaf genesis tot apokalips
dwaal die ou vrou deur Kyiv se paaie, blou
die katedraal se bloedglas, blou
verby klip om sirkel en deur melkblom flenters
blou muurpapier en asvaal laning
ouvrou vel onder ’n lawwe sambreel
toe die duif oë knip vir die vreetmasjien
en die sirkusolifante trompetter
panservoertuie, afgryslike besitname
bloed vloei skandelik oor die asfalt
’n bittere verlies, skandelike oorlogskrete
ag tog, die skare op sneeubedekte pleine
stad uitgewis, uit gesis, deur blou aar kneukelhand
© Melanie Grobler, 2022