Tarot-lesing
16/4/2022
Die wierook slier,
’n kersvlam
buig om sy spil:
Die noodlot daag ’n hand.
Die Keltiese kruis-lesing open
met Die Toring, die krag
van Mars – twee missiele het
die Moskva gesink.
Die betekenaars onthul
hofkaarte, swaarde en nog-
maals swaarde – konflik en verlies
en Zelensky word geëer
as Die Gehangde Man.
Die weerstandskaart – Putin,
Die Dwaas met die nul waarde,
alles of niks. Die bystandskaart wys
Die Keiser, Olaf Scholz se gesig:
hy herbou die Duitse Wehrmacht.
Op Goeie Vrydag loods die Oekraïne
’n paasseël van ouds, nóú
posseël, postuum. Uit een mond
weerklink die oorlogskreet
se memes en mantras:
Go fuck yourself!
Die Hiërofant staan op sy kop.
’n Middelvinger word semiotiek,
Die Wêreld herrys as kroonkaart
en Google Earth
toon die ruitverwysings
vir kernwapens.
Ek soek die uitkomskaart,
oorlog en profesie,
Openbaring en Nostradamus
en bid tot Saussure en Derrida
dat dié différance
uitgestel bly.
© Nini Bennett, 2022
Aangrypend! Nooit sou ek kon dink dat die teken van die middelvinger ooit iets anders as afsku by my sou wek nie – maar nou laat ‘n posseël my goedkeurend glimlag…