Ronel de Goede. Teddy & Nora

 

Teddy & Nora

 

Teddy & Nora het saam gelewe

op Toys ‘R’ Us se uitverkooprak.

En toe bankrotskap die baas laat bewe,

ontsnap in ’n plastieksak.

 

Teddy & Nora het saam geswerwe;

honger gely in New York se strate.

Stry gekry – hul vryheid aan skerwe.

Gevang oor hul doene en late.

 

Teddy & Nora moes apart gaan woon

in ’n traliekamp vir emigrante.

Konsert gehou en met kos beloon

vir hul rolle as figurante.

 

Teddy moes jag in ’n Mowgli-oerwoud;

Nora moes duik in ’n Frozen-plaspoel.

Met drome en planne as hul enigste behoud,

en ontvlugting as hul opperste doel.

 

Teddy wou na sy voorsate gaan soek

deur te ryloop na ’n piekniekbos.

Nora wou vaar na ’n vreemde uithoek

met ’n sneeukoningin op ’n eenhoringros.

 

Teddy & Nora het apart gesterwe:

hy op ’n knersvlak, sy op smeltys.

Daar’s niks as hul stories om oor te erwe.

Net die waarheid as droefste bewys.

 

© Ronel de Goede

 

Bookmark and Share

4 Kommentare op “Ronel de Goede. Teddy & Nora”

  1. Joan Hambidge :

    ‘n Puik (verdere) antwoord wat Opperman begin het en toe Pirow Bekker en De Goede in 1993, o.a.
    In Vuurwiel ook ‘n poging …

    https://maroelamedia.co.za/afrikaans/gedigte/gedig-boggom-en-voertsek/

    So word Leipoldt nogmaals vereer in hierdie slim gedig.

  2. Ronel de Goede :

    Dankie, Joan. Waardeer.
    R

  3. Bester Meyer :

    Ek is ook mal hieroor. Daar skuil ook ietsie groter agter die woorde. Mens kan net nie jou vinger daarop sit nie. Dis mooi. Dankie.

  4. Ronel de Goede :

    Baie dankie, Bester.
    Vriendelike groete
    Ronel

Los kommentaar

 

*