Susan Smith. hearing like a bat

 

hearing like a bat

 

… living in the time

between times.

– Linda Hogan

 

klein speekvlerk draketuig

mitiese dubbeldier ingevoude

sambreel en valskermspringer nagpyl

uit ’n boog wat klank soos sterre oes

 

jy leef in die gange tussen

die oop mond van die aarde

en sonlig bewaarder

van skemer oorgange

 

weer en weer golf die naaldprikke

van jou supersoniese polssange in

op timpane van tiermotte

en trominsekte

 

die geometriese landskap

van jou oorriwwe ’n Fresnel-lens

waarmee jy hoor om te sien

 

pas in die gevlerkte hangbeurs

glip uit die kou van ’n grot

veer deur die lug seiljag

van donker sneespapier

gooi ’n dun taal uit

jou kom en gaan teruggesmyt

uit die blou eggokamer van die nag

 

©Susan Smith: Die aarde is ‘n eierblou ark, Protea Boekhuis, 2016

 

Bookmark and Share

Los kommentaar

 

*