Virgin Active
Die lyflike boetsering van grofsmedery, swaardgevegte
en padkonstruksie is hier opgedateer tot ʼn nagebootste
ambag of geveg. ‘n Draaideur ̶ nes ‘n vleismeul ̶ roteer
voorstedelinge na binne die argitektoniese vertoonkas:
In die portaal glimmer ʼn swembad met drywende merkers,
watervlak in bane geklief: Kompetisie is eksplisiet. Werkers
pak koelkaste met fopvrug-vitamiendrankies, bestry
hiermee ‘n alomsigbare risiko van sweet. Trappe lei
na ‘n verhewe vlak waar gimapparate hurk soos prehistoriese
metaalfolteraars, elkeen met ʼn unieke pynigingsvernuf;
geensins afgeskrik paradeer aspirantmodelle, ʼn hipertrofiese hun,
blasende besigheidsmanne en sekretaresses in kondoomdun
kleefbroeke met spuitfonteinponiesterte en verslankingskure
in tuitbottels tussen die martelrakke. Spieëls flits knoetse,
kurwes en knoppe na begerige blikke: Narsissus se vertikale poele
beeldsend verleiding skamel deur Spandex® verbloem.
Die paar oorlewendes strompel na saunas
dampend met swael en stoom: Sondes
word verteer teen broodbaktemperatuur
in dié (ont)kleedrepetisies vir ʼn latere vuur:
Die nuwe siel is immers spiér.
© Franco Colin, 2022
Goed gedoen, Franco, en prikkelend.