Julian de Wette is op 26 Junie 1951 in Kaapstad gebore. Hy studeer aan die Sarah Lawrence College in die VSA, New York, waar hy ’n B.A.-graad behaal met Engels, Duits, Ekonomie en Internasionale Betrekkinge as vakke.
Hy was byna 30 jaar lank in die buiteland voordat hy weer na Suid-Afrika teruggekeer het. Sedertdien is hy op Napier in die Overberg woonagtig. Tydens sy verblyf in die buiteland het hy sy studies afgehandel en was hy in diens van die Verendigde Nasies in onder andere New York, Windhoek, Londen, en Bonn.
Sy eerste digbundel, Koning in die buiteland, is in 1977 uitgegee. In 1980 volg Verban: Verbinne en in 2002 Tussen duine gebore. In 2010 verskyn sy roman A case of knives.
Van sy gedigte word opgeneem in versamelbundels soos Groot verseboek en Die Afrikaanse poësie in ’n duisend en enkele gedigte en dit word ook in Nederlandse en Belgiese bloemlesings opgeneem. Hy skryf ook gedigte in Engels en deur die jare verskyn dit in tydskrifte soos New Contrast, Poetry Australia en Observations in New York, terwyl dit ook in die bloemlesing Somehow we survive in New York gepubliseer word.
[Nota van die Versindaba redaksie: Ons wil graag nuwe en ou digters aanmoedig om vir ons opgedateerde profiele aan te stuur na taljard.marlies@gmail.com
Van ‘n digter wat al een of meer solo-bundels by ‘n erkende uitgewer gepubliseer het, versoek ons die volgende:
-
-
- ‘n Redelik onlangse foto in JPG-formaat
- ‘n Lys van publikasies (ook die belangrikste nie-poëtiese publikasies)
- ‘n Kort lewenskets wat inligting bevat oor o.a. waar en wanneer jy gebore is en grootgeword het, waar jy studeer het, watter beroep jy beoefen of waarmee jy jou tans besig hou, waar jy op die oomblik woon, ens.
- Enige ander interessante feite oor jou
-
Skryf asseblief die profiel in narratiewe vorm en nie as ‘n reeks feite ondermekaar nie, ten einde dit meer lesersvriendelik te maak.
Indien jy bereid is om ‘n profiel te skryf oor ‘n gestorwe digter, laat weet my asseblief by taljard.marlies@gmail.com]