Sonder vermomming
Ná die onsmaaklike familietwis
ten lange laas besleg is
het drie geslagte met hul telge
vir die Kersmaal aangeskuif.
Aan tafel was die gees
opvallend gul.
Verlos van maskers
ou wrokke en vermomming
sou elkeen die spikkels son
van vrede en vergifnis
in mekaar se oë herken.
Toe het die ster aan die bopunt
van ‘n verminkte den
al helderder geflikker
asof ‘n koning kom
om tussen bloedfamilie aan te sit
en ‘n dankgebed te doen.
© Zandra Bezuidenhout, Sept 2022