Hendrik J Botha. Kobus Lombard word 70

 

 

 

Kobus Lombard    – 28 Oktober 1952

 

In hierdie mooiste mooiste maand met die hele land in rep en roer oor die sewentigste verjaarsdag van een van die grootste kontemporêre digters in Afrikaans, het my groot vriend en bose bondgenoot, Kobus Lombard van Namibië, ook stil-stil sewentig geword; sonder fanfare of opspraak, tiperend van hoe alles in sy lewe gebeur.

Hoewel hy nooit in die kollig beweeg het, of waarskynlik sal beweeg nie, het hy myns insiens tot dusver reeds ‘n betekenisvolle bydrae tot die Afrikaanse Poësie gelewer met vyf bundels agter sy naam en waarskynlik ‘n sesde iewers volgende jaar. Dit maak hom die mees gepubliseerde digter in Afrikaans wat tans woon in Namibië. (Ek weet Daniel Hugo het ook wortels in Namibië, maar hy woon op die oomblik na my beste wete iewers in die Willekaap.)

Ek wens dus namens myself, en ek glo namens die almal wat Afrikaanse poësie waardeer hierônner, vir Kobus geluk met sy verjaarsdag en wens hom alles wat goed en gaaf is toe. Vergun my asseblief ‘n gedig vir hom.

 

Gegroet,

 

Hendrik J Botha.

 

Steeds soekend na ‘n ma

Vir Kobus Lombard     – 28/10/1952

 

Byna sewe dekades sedert

skoorvoetend op die stoep

van Huis Maria Klopper

jy met die hand uitgesoek,

uitgekeer én opgelaai is om op

‘n plaas by Gobabis

soos ‘n hanslam groot te maak,

vir ‘n ander lewe

in vyf bundels

uitgespeel:

 

my woorde spring

van klip tot klip

na oewers

anderkant die stroom

soms trap ek water

soms stap ek droogvoets oor…

 

Tog verlang jy steeds saans

na ‘n koel hand op jou voorkop,

vind jy deesdae immer nog

vertroosting by haar

in opgemaakte onthoue:

 

versreëls beelde en sillabes nou

netjies metries ingepak

soos broodjies

in ‘n kosblik.

 

HJB 10/2022