Ars poetica
Tussen Louis Washkansky
en die Helderbergramp
staan my lewe opgeteken.
Denise Duvall in ‘n fratsongeluk
– op pad na Milnerton – sterf,
maar haar bloedjong hart red
ene Louis Washkansky
(met sy donkerswart oë)
agter ‘n skerm verhuld.
Die vliegramp nie oop-en-bloot
met vrae en spekulasie steeds
oor presies wát en wáárom?
Ondertussen tussen Hartskrif
en later in Gesteelde appels
verliese en oorplantings berym.
Goedskiks tel ek my woorde
(en gedigte) een vir een,
Two step teen glooiinge se grint.
Vergeet om te vermeld:
Denise se ouers het nie die M2
geneem nie, maar die hoofweg.
Dalk sou ‘n langer roete
‘n ander uitkoms bied
nes die vliegkaptein verplig
om die Helderberg te laat ópstyg.
Come hell or high water, nou
groei daar ‘n plant uit ‘n gebou.
© Joan Hambidge, 2022