Staalkaart
Die lyf glo verraai pyn
innerlik soos angs, woede,
teleurstelling. Die swelsels
op jou voete: hoë bloeddruk;
later bloedvatontsteking
weens ‘n lae witbloedtelling.
Sedert jou skielike oorvaart
pyn mý hele liggaam letterlik:
siekte as metafoor van Sontag.
Lacan se vlees wat uitwentel
in knoppe weens manque-à-être
of méconnaisance se misverstand.
Teorie bewys net woordeloos
en stomverslaan ons immer bly
in die aangesig van siekte.
Die syn van die self (m’être)
mag verdwyn, maar verdriet
vernietig spasies en skyn.
© Joan Hambidge, 2023