Amputasies
In die vloeibane van die koorsboom
word alle skadelike soute
en minerale afgetak,
sodat slegs ‘n enkele vergiftigde lid
verrot en later grondwaarts val.
Groen en gesond
bly die boom dus steeds
in die laagte staan.
So ook, offer die geitjie
liewers haar stert op
as om heelhuids
verorber te word
deur die springende kat.
(Meneer, het jy maar eerder vir my geluister,
die rook gestaak en beheer geneem
van jou bloeddruk, cholesterol en jou suiker.)
Nou Meneer is ek bevrees:
die sepsis sprei …
jou been moet
áf.
© Hennie Nortje 2023
Mooi gedig. Ek hou veral van die koorsboom beeld. Knap gedaan.
Baie mooi vergelykings.Treffende verwyt.