Spreekkamer
Mure spierwit of grys,
Strak en stemmig en stil
soos professioneel vereis.
Glimlag vriendelik, groet-gereed,
behulpsaam, hoflik.
(Ons is almal stoflik)
Vul in wat ons wil weet.
Dokter wag,
bekyk die lêer en die verslag.
Inligting om te deel.
Onemosioneel.
Kop wat knik
as iemand onhoorbaar snik.
Dokter en pasiënt
stap saam op hierdie pad
tot by die end.
Dankie vir die moeite.
Geen moeite.
Net jammer om te sê
hoe na jou einde lê…
© Andrea Sieberhagen, 2023