Beenaf
Vir etlike jare al is my bene nie lekker nie,
in hoofsaak weens te veel van te veel,
jy weet: sukkel met hoë suur, linkerknie
wat lol en soms – enkel, maar loop
sal ek loop, stram
en seer,
hinkepink, wankel,
rondomtalie, bokmakierie, ritteltit en riel,
stoftrap, hoogskop en pronk en kraai,
heeldag, aldag, agter jou aan met bene
wat nie lekker is nie,
want vir jóú wil ek nog pure somer wees
en warm, bruingebrand en slank
soos die dakgeitjie wat langs jou oor
verbyskarrel
teen ʼn sonverbleikte muur –
vir jou wil ek mooiweer wees
en talm.
Ja, dit veral.
© Louis Esterhuizen, 2023