ʼn Handvol pille
Soveel geraas, alle groottes en kleur: pers en blou,
bloupers en wit, of geel, rooi as tablet of kapsule, pille
vir die op en die af, vir sywaarts, wakker of slaap,
sooibrand, cholesterol en bloeddruk, pille vir die huil
of angs, vir iedere mankement, pille, pille,
vir dié of daai, sluk, twee-twee voor of ná ete,
soggens of saans –
soveel lawaai, die ontvlugting of berusting, nog, nóg
ad infinitum, en eindelaas: die toiletbak, want genoeg
die kakofonie van kleur
gedoof en brutaal in die drein af, heel gulsig
soos die toeklap van ʼn deur, die skrik se breë stilte,
oplaas met arms wyd gesprei voor die spieël –
in daardie stilte
vlerke groei en sweef.
© Louis Esterhuizen, 2023