Herkonstruksie
Beweeglikheid deur ‘n gewrigtige las ingeperk,
sitoplasma en kern van sluimer ontneem.
Te doring om teen die prikkels te skop
word sy kundig oopgeslag en ontbeen.
Waar die femur by bekkenbeen aansluit
pas prostese van keramiek en vlekvrye staal:
outografies in die vlees uitgeskryf
as die chirurg se mediese mylpaal.
In die intieme holte duskant boud en lies
skuillend van bloedstollende trombose.
Lewe word haar morfienologies ingeblaas:
dreunsang na epidurale narkose.
Heupsok en potjie word ‘n klankgevulde kom
waaruit wederskeppende vibrasies blom.
© Yolanda Faye Holden, 2023