Nervosa
ib
In die begin het Maät bespeur
dat hartversaking aan die wanorde
van die honger heelal was.
Voorts word massa teen ’n veer geweeg:
word te lig, maar meestal gewigtig geleef.
khet
In die esofagus se beker
bly voedigswaarde ’n mite,
word peristalse op sy kop gedraai.
Ensieme versnel voedselafbraak
om na spysvertering gal te braak.
swt
In die piramide se grafkamer,
te midde van strukturele verwering,
word die sjeoet in die kissie geberg,
maar rowers word steeds nie verhinder
om farao se skatkamers te plunder.
ren
Van monumentale belang
is om die silhoeët te beskerm
teen erosiewerking en verval.
Tydens die langdurige vastydperk
word ’n cartouche om die naam getrek.
ka
Ontneem van smaak, word daar swaar gesluk
aan die kookboek van die doderyk.
Lewenskrag word uitgeblaas,
organe in gesuurde flesse gestoor:
slegs stopsels linne en sand bly oor.
ba
Die liggaamsmassa-indeks
meetkundig op reliëf bereken.
Epitawe op papirusdun vel.
’n obelisk in die woestyn opgerig:
gedenknaalde van veergewig.
akh
Die mondopeningseremonie
sal van gebondenheid verlos.
’n Lewendgewende towerspreuk
ter hiernamaalse verering
na suiwering en purgering.
© Yolanda Faye Holden, 2023