’n Variasie op ‘n tema van Tarkovsky
In hierdie lewe en in enige ander lewe
het ek jou geken en sal ek jou weer
ken. Tyd verdwyn, ’n fuga
voëls – ons liggame sal ons vind
en dié droom sal herhaal en ook
jou droom word. Suid, aan die ander kant
van die land volg die kuslyn ons verhaal
van breekwater golf op golf. Op elke waterkruin
sluimer ’n dandelion, ’n galaksie, ’n ghong,
drome, werklikheid, dood – golf op golf.
Datums dateer: ek was, ek is, ek sal weer wees
want die lewe is die wonder van alle wonders.
En ek gee myself oor, ‘n weeskind,
op my knieë. In trane, in die laaste
breeklig neem ek my bejaarde moeder op my skoot.
* Verwysing: “I dreamed all this, and this I’m dreaming” soos uit die Russies vertaal deur Philip Metres en Dimitri Psurtsev.
© Nini Bennett, 2023
I Burned at the Feast. Selected Poems of Arseny Tarkovsky. 2015. Metres, P. En D. Psurtsev (reds). Cleveland, Ohio: Cleveland State University Poetry Center, p. 167.